رحلتى الى جزر هاواى – الجزء الثالث

 

نستكمل رحلتنا الى جزر هاواى وتحديدا جزيره OAHU اللى فيها العاصمه هونولولو

هحكى لكم عن يومى التانى فى الجزيرة

 

اليوم التانى مكنتش مخطط ليه بالظبط هعمل ايه وكنت بفكر أجر سياره والف بيها الجزيره لكن بعد ما شوفت ان الجزيرة فيها مشكله فى الركنات وفيها بعض الازدحامات فغيرت الخطه باليل وكنت بشوف اعلانات لشركات كتير بتنظم رحلات لعدة اماكن فى الجزيرة

رحلات يوم كامل او نصف يوم وكل رحله ليها خط سير معين لاماكن معينه فى الجزيرة وفى كل مكان هتلاقى اعلانات وكتيبات كتير عن الشركات اللى بتنظم الرحلات دى

فسألت فى الفندق عنها فقالى انهم بيعملوا رحله لكن يوم الاربع والسبت ب 45 دولار لكن السبت كان موعد سفرى وخفت اتاخر على الطيارة

فكان معايا شركات تانيه وجاء النصيب على شركه معينه ومعروفه عندهم وليها خبرة كبيرة فى الرحلات وكانت تقريبا ب 150 دولار متضمنين الغداء ورسوم الاماكن اللى هنزورها لو ليها رسوم (المبلغ مش كبير بالنسبه لوقت الرحله والاماكن وتستحق اكتر)

حجزت اون لين باليل قبل الرحله علطول وكانت الرحله تانى يوم وردوا عليا انهم هيشوفوا ويرودوا عليا لو اماكن متاحه خلال يومين وانا طبعا انصدمت لانى هكون سافرت

لكن الحمد لله كلمونى الساعه 6 الصبح وقالولى الباص هينتظرك فى مكان معين وبالفعل روحت المكان فى الميعاد واخدته وكان معايا فى الرحله ما يقارب من 10 اشخاص فقط كلهم Couples ما عدا انا كنت Single

الرحله كانت خطتها تلف الجزيرة كلها من جنوبها لشمالها ومن شرقها لغربها قطعنا ما يقارب 200 كيلو حول الجزيرة فكانت الرحله طويله مدتها 11 ساعه

 

ال Guide للرحله كانت سيدة من اهل الجزيزة الاصليين وهى اللى بتسوق الباص برضوا وطبعا عارفه تاريخ الجزيرة بالتفصيل وبتتكلم لغتهم الاصليه وعلمتنا شويه كلمات وكانت شخصيه مرحله جدا وشرحت لنا عادات عن الشعب الاصلى للجزيرة واكلاتهم واسلوبهم فى الحياه اللى هو كان قريب جدا من اسلوب شعوب الشرق الاوسط زى حبهم للكسل والراحه والاكل

صراحه هى ظبطتنى صور لانى كنت لوحدى وكانت لما نروح اى مكان تقولى ممكن اصورك لان الباقيين كل واحد معاه حد بيصورة

 

أجمل ما فى الجوله دى انها بتخليك تشوف الجزيرة من الداخل ومدنها والقرى والبيوت والحياه العاديه للناس هناك مش بس المناطق السياحيه المعروفه بس

فالشوارع والطرق والجبال والشواطئ اللى بتمر عليها كانت رائعه جدا وبتحس انك بتشوف صور او فيديوهات على اليوتيوب او صور من افلام او مسلسلات شوفتها قبل كدة مش واقع بجد انك فيه

 

الرحله كانت مرتبه جدا ومخططه بالوقت وكل مكان هياخد وقت اد ايه للوصول ليه وهنقعد فيه اد ايه وحتى هى هتقولنا فيه ايه

 

بدئنا الرحله الساعه 8 صباحا واتجهنا جنوبا وتوقفنا فى اكتر من 10 اماكن هقولهم على اهمهم

 

اول مكان وهو مكان معروف للجميع هو شاطئ مشهور وبيظهر كتير فى الصور الاعلانيه عن الجزيرة لانه جميل وجنبه بركان وهو شاطئ Hanauma Bay وهتلاقوا صورة ليه تحت توقفنا هناك واتصورنا فقط والجزيرة زى ما قولت كلها شواطئ جميله زى بعض

وبعدة دخلنا فى طريقنا حى الاثرياء والمشاهير فى هاواى وشوفنا منزل بيل جيتس وجاكى شان على المحيط وزى ما قالت ان المنازل هنا فى الحى دة بتبدأ من 5 مليون دولار

 

بعدها تحركنا مسافه كبيرة وروحنا مكان اول مره اسمع عنه مع انى دارس الجزيرة واشهر اماكنها جدا وهو اسمه Nu‘uanu Pali Lookout  المكان دة هو يعتبر مكان مرتفع على جبل ومنه بتشوف من فوق الجزيرة والمحيط وبتبص على منظر رهيب وخلاب وكانه الجنه بجد اتصورت فيه كتير بس للاسف الصور مش قادرة تبين مدى جمال وروعه المكان دة هحاول احط لكم فيديو افضل يبين شويه مدى جمال المكان

 

بعدها روحنا مكان تانى وهو برضوا كان غير مخطط بالنسبه ليا ومكنتش اعرفه وهو منطقه معابد The Byodo-In Temple كنائس ومعابد يابانيه ومقابر

مع انى مش من هواه زياره الاماكن دى ولا المتاحف ولا الحاجات التاريخيه دى لكن جمال المكان وتخطيطه وبالذات المعبد اليابانى كان جميل جدا وحواليه الاسماك بتاعتهم الملونه فى البحيرة والجو العام كان جميل مثل رخم زى زيارات الاماكن دى

واخدت فيه اجمل صور ليا صراحه

بعدها روحنا مكان اسمه Kualoa Regional Park المكان دة لو حطيت لك صورته الان وانت شوفتها هتقولى انا شوفته قبل كدة ومش غريب عليا لان اشهر الافلام والمسلسلات وحفلات الزفاف بتم فيه

وهو مكان مريح للنفس جدا وممكن تقعد فيه ساعات وهو ليه جو جميل جدا وهحط لكم فيديو ليه لان الصور مش هتعرف توضح جماله ( لو بتخطط لافضل مكان تعمل فيه فرحك بنصحك بيه هو مجانى ومش محتاج حجز ولا قاعه ولا حاجه يكفى المنظر- بس ابقى خد اتوبيس للمعازيم لانهم مش هيعرفوا يروحوا لوحدهم من على الدائرى )

 

بعدا اتحركنا مسافه ساعه فى الطريق لشمال الجزيرة وكانت الساعه 1 تقريبا وروحنا نتغدى والشركه كانت منظمه لنا الغداء فى مطعم على الطريق عامل زى المطاعم الشعبيه وبتاكل فى مكان مفتوح جنب مزرعه جمبرى وطبعا المطعم كل اكله اسماك وجمبرى من المزرعه مباشرتا وهنا تحس بالاكل الشعبى بتاعهم والشعب نفسه مش جو المطاعم الفاخرة وجو المنظرة دة

 

بعدها روحت شاطئ مشهور جدا عندهم وكتير بيتكلم عليه فى افضل الاماكن اللى ممكن تزورها وهو Sunset Beach صراحه بعد ماروحته وشوفته مش عارف ايه المميز فيه تماما وعادى جدا وفيه شواطئ احسن منه كتير وكانت الامواج فيه عاليه جدا لانه فى شمال الجزيرة هو ممكن يكون جميل للناس اللى بتحب تتزحلق على الامواج لذلك تركناه علطول

جنب الشاطئ دة فيه مكان للسلاحف لو مهتم تروح تتفرج

 

بعدها روحنا مكان اسمه Waimea Valley ومش عارف اقولهالك ازاى صراحه بس دى تعتبر حديقه هما عاملنها وفيها اشجار وحدائق وشلال ( على اساس ان البلد مفهاش حدائق او خضرة والجزيرة اصلا مفهاش الا خضرة واشجار)

المكان ليه رسوم وبتدخله ويعتبر هو حديقة مفتوحه فيها اشجار من جزر تانيه فى المحيط وشلال مياه هو مش كبير زى اللى فى الجزر التانيه وفيه مناظر جميل – بس مش شايف فيها مكان مميز قوى بالنسبه لجمال الجزيرة الطبيعى

هناك ممكن تشترى تحت ومنتجات خاصه بهاواى وفيه محلات وناس كتير من الشعوب الاصليه بتبيع الحاجات دى

لو عندك وقت ممكن تروحها لكن غير كدة مش مهمه

 

بعدها روحنا مكان اخر وكان اليوم قرب على الانتهاء وكان فيه امطار خفيفه وهو مكان اسمع Dole Plantation مش عارف انت واخد بالك من الاسم او لا بس لو شوفت صورة الاسم دة هتعرفه علطول وبتشوفة كل مره لما تروح اى سوق تجارى كبير

هو طبعا اسم شركه مشهورة للفواكه وتحديدا للاناناس

زى ما انتوا عارفين ان الاناناس من الفواكهه الاستوائيه وهما بيزرعوها هناك والشركه دى تعتبر اكبر شركه فى العالم فى زراعه وبيع الاناناس وهى عامله مزارع فى المكان دى وعامله مول كبير وسوق لكل منتجات الاناناس سواء اكل او شرب او ايس كريم او مشروبات او مصاصات ولبن وملابس وكل ما تتخيله وعليها اناناس وعاملين متاهه فى المزارع ورحله بالقطار للاطفال والاسر داخل مزارع الاناناس

هو جو المكان جميل وجديد لكن هو يناسب الاسر والاطفال اكتر هيستمتعوا فيه ومحبى الاناناس طبعا

 

ودة كان يعتبر اخر مكان لينا قبل ما ترجعنا للفنادق على الساعه 7 باليل

 

فيه مكان روحناه بس مش فاكر اسمه وهو يعتبر مكان زى ما قالت لنا سرى جدا للناس اللى عاوزة تروح شاطئ لوحدها وتستمتع بالهدوء وهو سرى بجد وعلشان تروحه بتدخل غابه لمسافه كبيرة وبتركن وبتمشى لغايه لما توصل للشاطئ

لكن الغريب فى المكان دة انى شوف فيه حاجه غريبه جدا وهى (الفراخ البلدى) بتاعتنا ايوه الفراخ والديوك البلدى المصريه مش البيضاء انا شوفتهم وهما طالعين من بين الشجر والناس بتأكلهم وبتصورهم على انهم طيور بريه ومعاهم طيور تانيه زى الطاووس

وتاكدت انهم بتوعنا من صوتهم وحركاتهم وصورته فيديو ليهم

مش عارف ايه اللى وصلهم لهناك والناس بتعاملهم هناك انهم طيور بريه ومش للاكل وبتحافظ عليهم

 

الملخص انا بنصح جدا انكم تحجزوا فى رحلات من هذة النوعيه مع شركه محترمه ليها خبرة كبيرة فى الجزيرة وتاخدوا اكبر رحله علشان تغطوا كل الاماكن او حتى تروحوا رحلتين

مع انى من الناس اللى بتحب تخطط رحلات بنفسها وبتروح كل مكان لوحده بس بجد عمرى ما كنت هعرف اروح الاماكن دى ولا كنت اعرفها ومكنشى فيه اى معلومات عنها حتى لما تدور فى افضل الاماكن فى الجزيرة

وحتى سعرها مش كبير على الوقت والمسافه والرسوم والغداء المتضمنين الرحله

 

انا كنت هخلى الجزء دة هو الاخير وكنت هتكلم عن اخر يوم ورحلتى الى ميناء بيل هاربر بس البوست هيبقى كبير جدا

علشان كدة هنعمل جزء رابع واخير فيه بقيه الرحله والسفر الى سان دييجو من هاواى

 

وبالتوفيق للجميع وانا شايف الناس مش متفاعله قوى فى التعليقات ولو فيه اى اسئله اتفضلوا ممكن ارد عليها

 

0