رحلتى الى جزر هاواى – الجزء الثانى

بعد ما اتكلمنا فى اهم نقطه الناس بتخاف منها لما نتكلم عن جزر هاواى وهى المسافه البعيدة والطيران والتكلفه الكبيرة

هنتكلم الجزء التانى عن جزر هاواى وشويه معلومات عنها وبعض الاماكن اللى زورتها واللى بنصحكم بيها

الاول خلينا اقولكم شويه معلومات عن الجزر نفسها لان هاواى مش بس مكان للسياحه او مصيف وشويه ومياه وشجر ورمال

لا هى تعتبر دوله فى حد ذاتها وكانت مستقله وكان ليها ملك لغايه لما انضمنت لامريكا كاخر ولايه ليها

علشان كدة هتلاقى ان الشعب فيها مختلف تماما عن الشعب الامريكى من ناحيه الشكل واللغه واسلوب الحياه لان هما فى الاصل من الشعوب البولينزيه اللى كانت بتعيش من زمان فى المحيط الهادئ وعاشوا فيها

وليهم لغه مختلفه ولما تروح هناك هتلاقى كل الناس بتقول بعض الكلمات وفى كل المحلات والمطاعم مع انهم بيتكلموا انجليزى بشكل رائع بس فيه بعض الكلمات زى الترحيب وكدة هيعلمهاك تقولها من لغتهم

ولغتهم نفسها لغه بسيط وتحس انها بدائيه بتتكون من 13 حرف فقط علشان كدة تلاقى الكلام بتاعهم فيه حروف متكررة كتير زى مثلا اشهر منطقه شواطئ عندهم اسمها( ويكىكيى )

وهما بينطقوا اصلا كلمها هاواى بنطق تانى علشان لما تروح وبيقولوا ( هوائى ) دة اسمها هناك

الشعب الاصلى الهاواوى هو اصلا يعتبر اقليه من السكان واغلب السكان اللى هما البيض الامريكان وبعض الاسيوين اما السكان الاصليين فهما قليلين ومش بتشوفهم الا فى الاماكن السياحيه والاحتفالات والرحلات

هما بصفه عامه شعب طيب وبسيط جدا وتحسه انه قريب مننا من ناحيه العمل والكسل ودة عرفته من واحدة كانت هى المشرفه بتاعتنا فى رحله فى الجزيرة خلال يوم كامل

هاواى بتتكون من 19 جزيرة رئيسيه بس اللى يعتبر مأهول منهم وينفع تروح تزوره هما 4 جزر

فيه طيران داخلى خاص بيهم بينقلك بين الجزر وهما قريبين من بعض جدا

دة تعريف بسيط بالجزر لكن فيه معلومات كتير عنها بس مش عاوز اطول فى الجزء دة

بالنسبه للموضوع الاهم وهو الاماكن اللى زرتها واللى انصح اى حد يزورها

بصفه عامه انا روحت جزيرة واحدة هناك لضيق الوقت وهى الجزيرة الرئيسيه وفيها العاصمه هونولولوا والحكومه وكل شئ مع انها مش اكبر جزيرة فى الجزر

علشان كدة هتكلم عنها ولكن فى جزر تانيه رائعه ممكن تروحها وفيه اماكن رائعه طبعا لو فيه وقت اطول

الجزيرة اللى كنت فيها اسمها OAHU وهى فيها المطار الرئيسى والعاصمه واشهر الامكان عندهم

انا وصلت المطار عندهم 9 باليل فروحت على الفندق مباشرتا ونمت طبعا بعد رحله السفر الطويله جدا جدا جدا

والصبح فطرت فى الفندق وروحت على الشاطئ علطول

طبعا قبل اى شئ وقبل ما تروح اى مكان لازم تلبس القميص الهاواواى الملون بالوان الورود والاشجار ودة بيتباع فى كل المحلات بكل الاشكال والالوان ب 20 دولار تقريبا وفيه للسيدات وكمان السيدات تعلق ورد فوق الاذن لان دة من ثقافتهم وكل السيدات والبنات من الشعب الاصلى هناك بيعملوا كدة
انا عن نفسى كان عندى قميص بتاع هاواى من 5 سنين اخدته من احدى الشركات فى سان فرانسيسكو فى سنه 2014 وفضل معايا وعمرى ما لبسته لانه مينفعشى يتلبس الا فى المكان دة والحمد لله بعد 5 سنين عرفت البسه

طبعا كتير هيسال عن الفنادق والشواطئ واحسن مكان فانا هقولهم الموضوع هناك بسيط جدا الجزيرة مليانه شواطئ رائعه ومفتوح للجميع بس يعتبر 80% من الفنادق والخدمات وكل الخدمات السياحيه متركزة فى مكان واحد وهو منطقه ويكيكيى -Waikiki  اللى قولت لكم على اسمها الغريب دة

دى منطقه فى العاصمه على البحر يعتبر اغلب الفنادق الكبيرة والصغيرة متركزة فيها والشواطئ امامهم

والشواطئ هناك مش مغلقه على فندق او كل فندق واحد جزء على الشاطى زى ما هو موجود فى دولنا. الشاطئ هناك مفتوح امام كل الفنادق وبتمشئ بين الفنادق على الشاطئ وهو منطقه كبيرة جدا

لذلك فى الاخيار فى الشواطئ والفنادق هناك سهل وكل الخدمات والناس والشوبنج هناك فى مكان واحد

بالنسبه لاسعار الفنادق انا مش بحب اتكلم عنها لانها شئ متفاوت من شخص للتانى وفيه ناس مش بتهتم بالفندق زيى لانى ببقى طوال اليوم بره ومش بحتاج الا مكان انام فيه فالاسعار هتلاقيها من اول 40 دولار لليله لغايه الالف بس الجميل ان الرخيص او الغالى جنب بعض ونفس المسافه للشاطئ وممكن تشوفوا الاسعار بالتفصيل على Booking والخيارات كتير جدا لكل واحد على حسب ذوقك وميزانيته

بالنسبه للناس اللى بتحب الخصوصيه والهدوء والطبيعه اكتر هيلاقوا شواطئ تانيه كتير وفنادق رائعه وهادئه جدا بس بعيدة عن مركز المدينه ومن تجربتى لعدة شوطئ هما كلهم بنفس المستوى بس اللى محتاج هدوء اكتر هيلاقى اماكن تانيه كتير

طبعا انا قضيت اول يوم على الشاطئ واتمشيت فى المنطقه والشوارع المحيطه وهيقابلك يابانيين كتييييييييير جدا اكتر من الامريكان وسكان البلد وحتى عاملين فى اغلب الاماكن اللغه انجليزى وبعدين يابانى لانهم يعتبر اكتر ناس سياح بيجوا البلد

وبعدين جنب الشواطئ فيه شارع رئيسى فيه كل المحلات والمطاعم وهو اسمه   Kalakaua Ave

وحتى لو انت مش مهتم انك تشترى اى شئ فالشارع نفسه يعتبر تحفه انك تمشى فيه وكله اشجار واضاءات وديكورات رائعه فهتستمتع انك تمشى فيه وتتصور ولازم تروحه وهو على بعد امتار من الشاطئ وممكن تتمشى فيه باليل

وهتجدوا بعض الصور للشارع والشاطئ فى الجزء تحت

بعدها روحت اتغدى وهناك مطاعم كتير وفيه مطاعم حلال موجودة وانا روحت مول كبير عندهم اسمه Ala Moana Center اتغديت فيه واشتريت خط موبيل علشان الانترنت والمول دة يعتبر اكبر مول عندهم وفيه كل المحلات لكن الاسعار عاليه ومفهوش شئ خاص بطبيعه هاواى او حاجات اللى تعتبر مميزة للجزيرة وهقولكم عليها بعدين علشان تشتروها كهدايا وتذكار

طبعا اسعار الاكل عاديه زى اسعار اى مكان فى امريكا ومهياش مشكله لاى شخص مسافر والمطاعم الامريكيه المعروفه كلها هناك

المواصلات هناك سهله جدا والجزيرة كلها متغطيه بشبكه اتوبيسات ضخمه هتوديك اى مكان من اول الجزيرة لاخرها وسعر التذكرة ب 1.75 دولار او تشترى تذكرى ليوم كامل ب 5 دولار وتركب اى اتوبيس طوال اليوم مجانا

وفيه اتوبيسات سياحيه ليها مسارات معينه فى الجزيرة وليها كذا خط سير بالالوان زى ال Hip on Hip off فى اى دوله تانيه والتذكرة ب 2 دولار فقط للرحله فتعتبر رخيصه جدا

وانا عن نفسى جربت كلهم وكانوا كويسين جدا والاتوبيسات نظيفه ومكيفه لان الجو حار طوال العام

وفيه تاكسيات واوبر وليفت وانا استخدمت ليفت عدة مرات للمشاوير القريبه وهو رخيص جدا وممكن تاجر سيارة من المطار وتقضى بيها كل الرحله بس انا عن نفسى مش بنصح بيها علشان اغلب الاماكن قريبه واماكن الركن قليلة وغاليه

نسيت اقولكم ان المطار هو قريب جدا من منطقه الشواطئ والفنادق والخدمات اللى قولت لكم عليها وحتى وانت على الشاطئ بتشوف الطائرات وهى بتطلع وتنزل

بالنسبه للجو والناس اللى بتسال اروح امتى . هو جو الجزيرة استوائى طوال السنه فهو دافئ فى النهار واليل انا لما كنت هناك كانت العظمى 30 والصغرى 26 فيعنى مفيش فرق فى الحرارة وكل الاماكن مكيفه

بس ابعد عن موسم الامطار من شهر نوفمبر الى شهر مارس واحسن وقت هو من ابريل الى اكتوبر لكن فى الحالتين الجوء دافئ طول السنه بس هتلاقى امطار

بالنسبه للناس اللى بتحب الشوبنج هو فيه كذا مكان للشراء العادى زى شارع Kalakaua ومول Ala Moana Center وطبعا فيه تارجيت وول مارت

وفيه اوت ليت فى وسط الجزيرة ممكن تروحوه فاكيد هو ارخص لكنى مروحتش لانى مكنتش عاوز اشترى شئ وكنت هشترى من سان دييجو وكمان مكنشى معايا شنطه

لكن الاهم هو ايه الاشياء المختلفه اللى ممكن اشتريها من هاواى وتعتبر شئ مميزا وتذكار ومش موجودة فى اى مكان تانى

انا دورت كتير قبل ما اسافر ولما روحت فهقول الخلاصه واللى انا جبته

هى الجزيرة بتشتهر بالقهوة والشائ والعسل والملابس بتاعتهم الملونه وبعض المنتجات المصنوعه من الاخشاب وكمان الجيتار بتاعهم وفيه تحف على اشكال حيوانات وهى صناعات يدويه

وهما بيعملوا يوم السبت سوق للمزارعين والناس العاديه علشان يعرضوا المنتجات بتاعتهم وهو سوق جميل جدا وفيه روح البلد وهو جنب حديقه الحيوان عندهم وعلى فكرة حديقه الحيوان دى جنب منطقه ويكيكيى برضوا يعنى مش هتتحرك كتير

وانا عن نفسى اشتريت قهوى وشاى وعسل من هناك مع انى مش خبير فيهم ومعرفشى الفروق بس يعتبر دة اشهر شئ مميز عندهم

حتى لو روحت تارجيت او وول مارت هناك هتلاقى فيه قسم كامل للمنتجات الخاصه بهاواى واكسسوارات وصابون بتاع هاواى ومنتجات تجميل طبيعيه وملابس

فيه بعض الصور للسوق دة فى البوست

فى نهايه الجزء التانى احب اقولكم ان جو الجزيرة رائع جدا طول السنه والناس طيبه وتنفع للجو العائلى والفنادق والشوطئ مفتوحه للجميع وفيه مستويات كتير للفنادق والتنقلات سهله ورخيصه

واللى سافر امريكا قبل كدة فى اى ولايه هيحس ان فيها كل الخدمات الموجودة فى باقى الولايات التانيه

ان شاء الله فى الجزء الثالث والاخير هحكى لكم عن اهم رحله روحتها هناك وهى جوله فى كل الجزيرة لمدة 11 ساعه وكمان رحلتى الى ميناء بيرل هاربر والمتحف البحرى هناك ورحله الرجوع