رحلتى الى جزر هاواى – الجزء الاول

رحلتى الى ارض الاحلام والجمال والطبيعه الخلابه والارض البكر

دائما ما كنت بحلم ان ازورها فى الحقيقه وكنت دائما بتابع اخبارها واشوف افلام وثائقيه عنها وبشكل غير مباشر كنت بشوفها فى افلام ومسلسلات كتير امريكيه متصورة فيها

وللاسف مفيش مقالات كتير او موضوعات بتتكلم عن السياحه او طبيعه هذة الجزر باللغه العربيه – لاسباب كتير هنعرفها كمان شويه –

ان شاء الله هحكى لكم فى عدة اجزاء رحلتى لان فيه تفاصيل كتير فيها واحداث كثير وكمان عاوز اوضح بعض النقاط عن  هاواى علشان نحاول نكسر الحاجز اللى دائما جوانا لما حد يتكلم او نسمع اى شئ عن هاواى وانها بعيدة جدا وشبه مستحيل نروحها وغاليه وغيرها من الحاجات اللى بتخلينا نفكر فى هاواى كأنها جزيرة خياليه نسمع ونشوفها من بعيد ومن الصعب نفكر اننا نروحها

انا كنت عاوز ابدء الموضوع عن التعريف بالجزيره وتاريخها وسكانها ولغاتها لكن لانى عارف اللى بيقراء دلوقتى البوست هيبقى كله حماس واول شئ عاوز يعرفه ازاى روحت وسافرت ليها واتكلفت كام – علشان كدة هبدأ بالجزء دة الاول وبعدين قبل ما اتكلم عن الاماكن اللى فى الجزر اللى زورتها هعرفكم على الجزر اكتر ( جزر هاواى تاريخ وشعب وثقافه مش بس شويه شواطئ وميه وأشجار)

برائى المتواضع هى الاصل لو هتقارنها بالمالديف او بالى او اى مكان تانى مشابه

ازاى تسافر الى هاواى:

علشان اوضحلك مكان هاواى بشكل بسيط واوضح ليك المسافه جزر هاواى موجودة فى منتصف المحيط الهادئ فى المنطقه الاستوائيه وهى اخر ولايه انضمت لامريكا عام 1898

وعلشان ابسطهالك لان المحيط ضخم جدا وفيه جزر كتير هاواى تعتبر فى الناحيه التانيه من العالم بالنسبه لمصر – لو انت مسكت كره ارضيه من المدورة دى فى ايدك وحطيت يدك على مصر ولفيت الكورة الارضيه الناحيه التانيه تماما هتلاقى الجزء

وعلشان نكون دقيقين اكتر هى مقابل السودان بالظبط

علشان كدة توقيتهم يفرق عن مصر 12 ساعه بالظبط ( يعنى فى مصر 12 الظهر هما يبقى عندهم 12 باليل)

طبعا الجزر تعتبر ابعد نقطه لينا لانها زى ما شوفنا فى الجانب الاخر من العالم بالظبط وكمان موضوع الطيران ليها طبعا صعب وطويل بس الموضوع يستحق المغامرة وانا كنت مستمتع بالرحله وهادئ جدا مع انها كانت طويله جدا

( طبعا الناس اللى غاويه سفر ومغامرة مش بيحسوا بتعب السفر لانه بيبقى جزء من الرحله بجماله وليس تعب ) الناس حبايبنا اللى بيتعبوا من الطيران والسفر ممكن ميكملوش الموضوع ويحولوا على تقرير رحله العين السخنه ( انا بهزر طبعا)

بما انى مقيم فى السعوديه فكانت بدايه الرحله من الرياض ولانى كنت رايح فى الاساس أمريكا فى رحله عمل لحضور مؤتمر فى سان دييجو فاستغليت الفرصه وخليت الشركه فى امريكا تحجز لى رحله طيران من الرياض الى لوس انجلوس والرجوع من سان دييجو الى الرياض

وبين لوس انجلوس وسان ديجو كانت رحلتى الى هاواى وحضور المؤتمر فى سان دييجو

واخترت رحله الطيران ان اروح لوس انجلوس علشان هى اقرب نقطه الى هاواى وعلى المحيط تماما ومنها بيطلع كل شركات الطيران الامريكيه الى هاواى وتحديدا الى هونولولو وفيه مواعيد واختيارات كتير للسفر بعكس سان دييجو بيكون مواعيد بالنهار فقط

علشان اوضح لكم موضوع الطيران بصفه عامه بعيد عن الطريقه اللى روحت بيها الى هاواى لانها كانت ملخبطه وفيه 8 رحلات طيران علشان ظروف وخطط ليا

انت ممكن تسافر ليها عن طريق رحلتين واقصر وقت شوفته كان 22 ساعه طيران على رحلتين – طبعا مفيش مباشر تماما من اى مكان فى اوربا او الشرق الاوسط الى هاواى –

وكل الرحلات بتم ناحيه الغرب يعنى من اى دوله عربيه الى امريكا ومن امريكا الى هاواى – او من دولنا العربيه الى اوربا ومن اوربا الى امريكا ومن امريكا الى هاواى –

نظريا ممكن تروحها من جه الشرق يعنى من دولنا العربيه الى اليابان او الفلببين او استراليا ومنها فيه رحلات كتير الى هاواى – لكن دة صعب شويه لان الشركات دى ملهاش رحلات لاغلب دولنا العربيه ونتائجها مش بتظهر فى نتائج البحث فى مواقع البحث زى sky scanner فلازم تروح تدور على موقع الشركه نفسه ولانى فى السعودية وفيه الطيران الفلبينى بيجى هنا فدورت على موقعهم ووجدت ان سعرهم قريب من اسعار الرحلات من ناحيه الغرب

وعلشان اوضح لكم اكتر لو انت فى مصر مثلا فاقرب طريق ليك هو انك تحجز طائرة على مصر للطيران الى نيويورك وبعدين من نيويورك تاخذ رحله تانيه مثل طيران طيران هاواى Hawaiian airline ( انا جربته ومحترم جدا بالنسبه للشركات الامريكيه الاخرى)

والرحله دى يعتبر اقصر رحله وجدتها تعتبر 22 ساعه طيران من غير الترانزيت طبعا

بالنسبه للناس اللى عايشه فى السعوديه او الامارات او قطر ممكن يعملوا نفس الرحله او يغيروها انها يروحوا من بلدهم مباشر الى لوس انجلوس ودى موجود لديهم ومش متاح فى مصر ومن لوس انجلوس فيه 6 شركات طيران ليها اكتر 20 رحله يوميه الى هونولولو

بالنسبه ليا لانى مكنتش عندى اختيارات كتير لان الحجز كان عن طريق الشركه المنظمه للمؤتمر فاعطونى كذا اختيار على الطيران الالمانى والبريطانى وانا اخترت الالمانى (Lufthansa) لان دى تعتبر المرة التالته اللى اسافر امريكا معاهم وهما ملتزمين فى مواعيدهم وخدماتهم كويسه

فرحلتى بدئت من مطار الرياض الى فرانكفورت الساعه 2 صباحا تقريبا وكانت مدة هذة الرحله 6 ساعات تقريبا

ومن مطار فرانكفورت اللى يعتبر متاهه بتصميمه الغريب وحجمه الضخم قضيت اربع ساعات ترانزيت قبل ما اخد الرحله التانيه الى لوس انجلوس ودى طبعا كان اطول واحدة فيهم ومدتها 12 ساعه

ومن مطار لوس انجلوس انتظرت اربع ساعات ترانزيت تانى بس مروا بسرعه لانى روحت الجوازات الامريكيه وكانت زحمه وبعدين روحت صاله الطيران الداخلى والتفتيش تانى فيها واخدت رحله الطيران الهاواوى لمدة تقارب من ال 6 ساعات

وقت الطيران الاجمالى كان 24 ساعه طيران بالاضافه الى 8 ساعات ترانزيت فى المانيا وامريكا غير طبعا الوقت اللى بتروحه قبل موعد الطائرة فى مطار الرياض والوصول للفندق فى هونولولو

فلما حسبت كل دة لقيت انى قضيت يوم ونص بالظبط فى الطريق

لكن من غرائب فروق التوقيت ووالمناطق الزمنيه البعيدة انا وصلت هونولولو فى نفس يوم السفر مش تانى يوم يعنى بالظبط سافرت يوم 13 نوفمبر الساعه 2 باليل ووصلت الساعه 9 باليل نفس اليوم ( طبعا الساعه البيولوجيه باظت تماما )

طبعا بعد ما وضحت بقدر الامكان طريق السفر بالنسبه لى وبصفه عامه واقرب الطرق

كتير هيسال اتكلفت كام

طبعا الرحله مش رخيصه ولو حسبتها اجمالا كسعر التذاكر اتكلفت فى حدود 7 الاف ريال سعودى بس انا دفعت منهم 1450 ريال فقط وبالباقى على الشركه ( دى سعر 8 رحلات طيران خلال 10 ايام)

لكن انا هقولكم بعض الحاجات اللى ممكن تروحوا بيها هاواى بنص المبلغ دة لانى انا دورت كتير على الموضوع

لو روحت دورت مباشر على مواقع الطيران زى expedia or sky scanner او غيرهم واخترت انك تسافر من القاهرة مثلا الى هونولولو هتلاقى اسعار كتير متفاوته وطبعا فيه كله توقف مرة او اتنين

طبعا سعر الرحله اللى فيها التوقف لمرة واحدة هيبقى غالى جدا لكن هتلاقى حاجات رخيصه كتير بس هتتوقف مرتين وانا جربتها وكانت شئ عادى مش مخيف او شئ ( مش عاوز اقولك انا علشان ارجع من هاواى الى الرياض فى العودة ركبت 5 طائرات على 3 خطوط طيران مختلفه بس استمتعت)

فممكن تلاقى رحله فى حدود 3300 ريال من القاهرة الى هونولولو بس هتتوقف مرتين  يعنى 880 دولار تقريبا (اظنه سعر كويس جدا بالنسبه للمسافه البعيدة جدا وقريب من اسعار رحلات كتير اقرب)

او فيه طريقه تانيه ممكن تعملها وانا عملتها وهى انك تحجز طيران من بلدك الى امريكا وتشوف ايه ارخص رحله الى اى مدينه امريكيه فيه بعض الدول زى قطر والامارات وتركيا والسعوديه بيكون فيه اختيارات كتير لرحلات الطيران الى مدن كتير

ومن المدينه الامريكيه دى هتقدر تحجز رحله طيران الى هاواى حتى لو مش مباشر بس هتلاقى ان اسعار الطيران فى امريكا رخيصه جدا

انا مثلا حجزت من لو انجلوس الى هونولولو على طيران هاواى كان فى حدود 170 دولار ورجعت على طيران America Airline وكانوا رحلتين مش رحله واحدة الى سان دييجو ب  دولار180 تقريبا مع ملاحظه ان المسافه طيران تقريبا 6 ساعات يعنى مش رحله قصيرة يعنى زى رحله من مصر الى الهند مثلا ( ممكن تحجز نفس الرحلات دى باسعار اقل بكتير لو عندك اختيار فى موضوع الايام ومواعيد الرحلات)

فالملخص لموضوع الاسعار دة محتاجه شويه تخطيط وتكون مستعد انك هتركب رحلات كتير ومطارات كتير ففى الحاله دة هتوصل لاسعار قريبه من اسعار ممكن تدفعها فى رحلات لماليزا وتايلاندا مثلا مع ان المسافه هى الضعف

انا رحلتى كان فيها 8 رحلات طيران على 4 شركات طيران مختلفه وانا كنت متعمد انى اجرب شركات طيران مختلفه علشان يبقى جربت كل شركات الطيران الامريكيه

انا وصلت مطار هونولولو الساعه 9 مساءا بتوقيتهم ودة مطار العاصمه لان فيه مطارات كتير فى كل جزيرة ومنها اخدت تاكسى الى الفندق ويعتبر المطار قريب جدا من المكان الاهم فى هونولولو وهى منطقه ويكيكى ودة اللى هنتكلم عنها فى الجزء الجاى ان شاء الله لان فيها اغلب الخروجات والفسح

اسف انى كتبت كل دة فى الجزء الاول بس انا حاولت اوضح مكان الجزر وازاى توصلها لانها دى تعتبر اكبر صعوبه لاى حد بيفكر يروح لهاواى

واكمل لكم فى الجزء الثانى والثالت رحلتى فى جزر هاواى

وبالتوفيق للجميع